Да се роди дете е вистински благослов. Но, по породувањето, мајките честопати се соочуваат со злобни коментари насочени кон изгледот на нивното тело.
Мајка на 5 деца, која добила негативни коментари на фотографија на Instagram, одлучи да го крене својот глас. Во моќна објава, Бренда порача дека не се срами од долините со стрии и планините од кожа на стомакот, туку дека се гордее со нив.
Како одговор на сите пораки полни со омраза кои ги добив на фотографија од мојот стомак. Охрабрена сум да ја споделам оваа порака гласно!
Да, имам долина од линии исцртана по мојот стомак, планини од растегната кожа останати во средината на стомакот, светли громови од страните и на мојот грб – сите знаци дека сум носела живот внатре во мене... петпати! Исто така имам и лузна од царски рез, која ме потсетува дека мојот стомак беше сечен двапати!
Моето тело е неверојатно.
Моето тело е прекрасно.
Моето тело е моќно.
Моето тело е силно.
Моето тело е способно.
Моето тело ме направи мајка.
Моето тело израсна човечко суштество.
Ја нема секој таа привилегија.
Па, додека општеството сака да седи зад екран и да нè етикетира како несовршени, јас сум тука за да се потсетам себеси, а и сите вас дека за нашите деца ние сме совршени. Тие гледаат зад растегнатата кожа, стриите и лузните. Тие нè гледаат баш какви што навистина сме. Тие ни го гледаат срцето и нè сакаат безусловно. И тоа е она што е важно.
