Големо отворање на реконструираните живеалишта во Зоолошката градина во Битола ќе се одржи на 6 декември (сабота) 2014 година, со почеток во 11:00 часот, во Зоолошката градина Битола.
На промотивниот настан ќе бидат промовирани живеалишта за мечка, рис, лав, тигар, лисица, ракун, мајмуни, како и фарма за домашни животни и 2-та комплементари објекти – влезот и билетарата во Зоолошката градина Битола. Реконструкцијата на живеалиштата во Зоолошката градина Битола се одвиваше во рамките на проектот „Иновативни едукативни програми за зајакнување на природните ресурси во прекуграничниот регион Пелагонија/Лерин – ЗОО иноватива“, финансиски поддржан од страна на делегацијата на Европската Унија и Министерството за локална самоуправа, во рамките на Програмата за прекугранична соработка помеѓу Република Македонија и Република Грција.
Фарма за домашни животни
Живеалиште за лав и тигар
Живеалиште за мајмуни
Живеалиште за мечка
Живеалиште за рис
Во официјалниот дел на промотивниот настан поздравни обраќања ќе имаат: д-р Ѓорге Иванов (претседател на Р. Македонија), г. Робин Лидл (Министер Советник – Делегација на Европската Унија), заменик министерот за локална самоуправа г. Љупчо Пренџов, градоначалникот на општина Битола д-р Владимир Талески и директорката на Центарот за развој на Пелагонискиот регион г-ѓа Емилиа Ѓероска.
Во музичкиот дел од промотивниот настан ќе учествуваат музичките ѕвезди Ламбе Алабаковски со детскиот хор Ѕвончиња, Паркети, Бојан Стојков, детските ѕвезди од музичкиот фестивал Тра-ла-ла и детската транцова група Степ Ап. Промотивниот настан ќе биде збогатен со анимациски содржини наменети за најмладата популација, а ќе бидат доделени и голем број на промотивни материјали за сите посетители на настанот.
Центарот за развој на Пелагонискиот регион го реализира овој проект во партнерство со општина Битола и Зоолошката Градина во Битола, како и со општината Лерин и Регионалната развојна Агенција од Лерин, Република Грција.
