Луис Мануел Гонзалес има само 10 месеци, а веќе тежи 28 килограми, односно колку просечно 9-годишно дете. Докторите не можат да се согласат околу дијагнозата, а неговите родители се очајни за помош.
Мајката Изабел Пантоха на почетокот не била загрижена за дебелината на Луис, затоа што сметала дека е резултат на нејзиното мајчино млеко. „Мислев дека се случува тоа затоа што имам добро мајчино млеко“ - рекла таа. Но, откако бебенцето започнало нагло да ја зголемува тежината, Изабел и нејзиниот сопруг Марио побарале медицинска помош.
Загрижените родители го носат Луис на испитувања по четири пати неделно. „Боли кога ги гледам сестрите како бараат вена помеѓу витките од кожа на неговите раце“ - изјавил таткото.
Првичната дијагноза била Прадер-Вили синдром, генетско пореметување кое кај новороденчињата се манифестира со слаба мускулатура и постојано чувство на глад. Сепак, таа дијагноза била отфрлена бидејќи Луис не се храни премногу обилно и не бара јадење непрекинато.
Семејството било контактирано од д-р Силвија Орозко, која направила неколку тестирања и ги очекува резултатите за да си ја потврди теоријата дека проблемите на Луис се резултат на тоа што неговата мајка не внесувала одредени нутриенти за време на бременоста. Ако се потврди тоа, таа тврди дека Луис ќе може лесно да се излекува со хормонски инјекции.
Родителите преку социјалните мрежи се обидуваат да соберат средства за лекување на бебето.
