Криси Тиген е ѕвездата од насловната страница на Elle UK.
За јануарското издание на списанието, 33-годишниот модел сними фотосесија на плажа во Малибу, за која позираше во модели од врвни модни брендови како Ралф Лорен, Келвин Клајн и Норма Камали. На корицата таа е облечена целосно во Диор.
Во интервјуто за списанието, славната сопруга на Џон Леџенд зборуваше за самодовербата, присуството на социјалните мрежи, за лажната реалност на социјалните мрежи, за зголемената моќ на жените и за сопругот.
„Никогаш не треба да се чувствувате како да пропуштате нешто. Во животот има многу повеќе од овие лажни Instagram луѓе“ – рекла таа за социјалните мрежи.
За стриите: „Сите ги фотошопираат. Тоа е лудост. Бев на снимање на Victoria’s Secret и за мене беше пресвртна точка кога ги видов тие жени со лузни и стрии и модринки. Кој вели дека тоа е некаков недостаток?“
„Уште од 17-годишна возраст ја знаев мојата тежина наутро, поручек и навечер. Верувајте ми, цифрата тогаш беше многу поразлична! Но, не бев толку среќна.“
Криси секогаш ја прикажувала реалноста на своите фотографии и поради тоа е обожавана од своите 10 милиони следбеници на Twitter и 21 милион на Instagram. „Мажите секогаш ми приоѓаа откако снимив фотосесија за Sports Illustrated. Но, сега сите го велат истото нешто: Мојата девојка те обожава. И не можам да бидам посреќна“ – рекла таа.
„Денес модната индустрија дефинитивно е понежна кон жените. Некои брендови услужуваат многу различни типови на тела, па очигледно е кој ги поддржува жените, а кој не. И тоа не е само во модата. Никогаш не сум видела жените да имаат поголема борбеност во себе одошто сега. Подготвени сме да ги изнесеме проблемите на виделина“ – вели Криси за модниот свет.
За моментот кога го запознала Џон: „Не беше ништо од типот: ‘Тој е многу секси’, но се разбира тој го направи првиот чекор. Поминавме 12 часа заедно, па тоа е како 12 состаноци, нели? Никогаш не си велев: ‘Ова е човекот за кого ќе се омажам’.“.
