Кога жена ќе застане пред огледало, голема е веројатноста да започне да ги гледа несовршеностите во надворешниот изглед. Тоа е женска маана која ја имала дури и Одри Хепберн.
Иако неспорно е една од најубавите жени на сите времиња и една од најголемите модни икони во историјата, Одри не се сметала себеси за убава жена. Во интервју за Vanity Fair, синот на Одри, Лука Доти, открил дека таа се сметала за „добра комбинација од недостатоци“.
Одри Хепберн на насловната на мајското издание на Vanity Fair
„Таа сметаше дека има голем нос и големи стапала, дека е премногу слаба и дека нема доволно големи гради. Ќе се погледнеше во огледалото и ќе речеше: Не разбирам зошто луѓето ме гледаат како убава“ – изјавил Лука.
Интервјуто било направено по повод издавањето на неговата книга „Audrey in Rome“ во која ќе има 2.500 фотографии од Одри во вечниот град.
Одри не се плашела од стареењето и дури и се прашувала зошто жените премногу се трудат да изгледаат млади. „Секогаш по малку се изненадуваше од напорите кои жените ги вложуваат за да изгледаат млади. Таа беше среќна за тоа што старееше, бидејќи тоа значеше дека има повеќе време за себе, повеќе време за семејството и значеше разделба од лудоста за младоста и убавината која владее во Холивуд“ – раскажал тој.
Присетувајќи се на стилот на Хепберн, Доти открил дека марамите биле нејзиниот „порок“. „Како и секоја жена, таа имаше 30 или 40. Тоа беше добар начин да се прикрие – големи очила за сонце и марама. Одвреме-навреме можеше да оди на шопинг без да биде следена од толпа луѓе“ – раскажал тој.
