Ивана Трамп издиша за последен пат на 73-годишна возраст.
Првата сопруга на поранешниот претседател на САД, Доналд Трамп, беше пронајдена мртва во нејзиниот дом во Њујорк. Според извештаите, таа паднала по скали, но официјалната причина за смртта треба да биде допрва соопштена.
„Ова е многу тажен ден, многу тажен ден“ – рече нејзиниот син Ерик додека го напушташе домот на Ивана.
Последните денови Ивана ги поминала во планирање на нејзиниот одмор во Сен Тропе и тој ден имала закажано термин во фризерски салон кој го пропуштила.
Доналд преку социјалните мрежи ја сподели тажната вест со сите свои следбеници.
„Со голема тага ве информирам сите кои ја сакавте, а такви има многу, дека Ивана Трамп почина во нејзиниот дом во Њујорк. Таа беше прекрасна, убава и неверојатна жена, која имаше инспиративен живот. Нејзината гордост и радост беа нејзините деца... Многу се гордееше со нив, а и тие со неа. Почивај во мир, Ивана“ – напиша тој.
Парот стапи во брак во 1977 година, а се разведе во 1992 година. Имаа три деца заедно – Доналд Џуниор, Иванка и Ерик.
Ивана порасна во поранешната Чехословачка. Нејзините таленти за скијање ѝ носат можности да патува низ Европа и така го запознава својот прв сопруг со кого стапува во брак и се преселува во Канада. Пред да го запознае Доналд во 1976 година, Ивана работи како ски инструкторка во Канада, а потоа започнува да чекори во светот на модата.
Тие се запознаваат додека таа како модел снима фотосесија во Њујорк во 1976 година, а девет месеци подоцна, го кажуваат судбоносното „да“. Ивана помага во дизајнирањето на познатата кула „Трамп“ и во менаџирањето на хотелот „Плаза“.
Како обожавателка на модата и дизајнер на накит, низ децениите присуствува на многу модни ревии и гламурозни настани.
