Денес во Скопје започнува снимањето на филмот „Денот на жената“.
Новиот филмски проект ќе биде во режија на Гоце Цветановски, а темата на крими трилерот e трговијата со жени и присилната проституција.
Главната женска улога ѝ припадна на Слаѓана Вујошевиќ. Талентираната актерка, чиј глас е познат по ликот Биби од детскиот анимиран серијал „Сказните на Биби“, ќе глуми новинарка која смело истажува и разоткрива вистини пред јавноста.
Слаѓана Вујошевиќ и Гоце Цветановски
Главните машки улоги ќе ги толкуваат Муса Исуфи и Исмаил Касуми, актери од Кумановскиот театар кои се имаат закитено со бројни награди на повеќе меѓународни филмски фестивали.
Официјалниот постер за „Денот на жената“
Покрај Цветановски, продуценти на филмот се и Богдан Јончевски и Дритон Рамадани.
Директор на Фотографија е Фејми Даут, кој минатата година беше номиниран за Оскар за филмот „Медена Земја“. Даут е добитник на повеќе меѓународни признанија за најдобра фотографија, меѓу кои и престижната награда од Американската Асоцијација на Кинематографи.
Гоце Цветановски е наградуван режисер и продуцент од Македонија. Студирал филмско сценарио и режија во Париз, Франција, каде што живее од 1998 до 2015 година. Има режирано и продуцирано околу 20 кратки филмови, прикажани на над 100 филмски фестивали во светот.
Во 2015 година станува креативен директор на Lynx Animation Studios, најголемо студио за 2Д анимација на Балканот, и се враќа во Македонија каде што работи на првиот македонски долгометражен анимиран филм, научно фантастичната комедија „Јон Вардар против Галаксијата“. Со буџет од 1.2 М евра, ова е досега најголем проект за анимација во регионот на Балканот и е копродукција меѓу Унгарија, Бугарија и Хрватска.
Гоце е исто така режисер на најуспешната македонска анимирана ТВ серија со над 15 милиони прегледи на Јутјуб за помалку од две години, а во моментов и најбрзо растечки детски бренд на Балканот, „Сказните на Биби“.
Во 2016 година, Гоце го режираше музичкиот спот „Cone of Shame“ за познатиот американски рок / метал бенд Faith No More. Видеото доби одлични критики од музички списанија низ целиот свет, вклучувајќи ги Ролинг Стоун, Метал Хамер, Консеквенс оф Саунд и многу други.
Филмот се снима со поддршка на Агенцијата за филм. Медиумски партнери на проектот се femina.mk, fakulteti.mk, skd.mk и Слободен печат.
