Викторија Лоба во ресторанот „Four“ го промовираше својот прв студиски албум „Нов свет“, кој има и англиско издание насловено „New World“.
„Сè уште не можам да си ги соберам импресиите и емоциите! Мојата среќа нема крај. Ви благодарам на сите кои бевте на вчерашната промоција на мојот албум „НОВ СВЕТ“, верувам дека успеав преку музичките вибрации да ви ја пренесам пораката и да ви подарам НОВ СВЕТ, свет исполнет со љубов и среќа“ – напиша Лоба на Instagram.
На настанот, македонската музичка ѕвезда носеше црн фустан со деколте и висок шлиц.
Музички продуценти на албумот се Марга Сол и Роберт Билбилов. Викторија Лоба се појавува како текстописец на албумот, во кој на суптилен начин го раскажува сопствениот живот.
Во рамки на настанот, Лоба и Марга Сол настапија со песните „Она вистинско“, „Девет работи“ „All the love“ и „Нов свет“ кои се дел од новиот албум. Промоцијата помина во одлична атмосфера, а Марга Сол ги забавуваше гостите до самиот крај. Својата поддршка на Лоба ѝ ја дадоа бројни славни личности, меѓу кои Роберт Билбилов и Тајзи, со кои Лоба има две соработки, односно дуети во рамки на албумот.
