Енди Мекдауел гордо тврди дека раскрстила со фарбите за коса и дека е многу посреќна од порано.
Во интервју за People, 64-годишната актерка изјави дека престанала да се фарба за време на пандемијата и дека го обожава својот нов изглед. Инспирацијата за тој потег дошла од нејзината сестра.
„Мојата сестра е целосно седа, а е само 18 месеци постара од мене. Сметав дека изгледа многу поубаво со седа коса. Ѝ завидував“ – рекла Енди.
„За време на КОВИД, можев да си ги видам корените и ми се допадна тоа. Чувствував дека ќе бидам посреќна. И сум посреќна. Навистина ми се допаѓа. Имам 64 години и ова е најдобриот период во мојот живот. На крајот на краиштата, ќе имам сребрена коса“ – додала таа.
Енди вели дека мора постојано да работи на прифаќање и сакање на нејзиното тело додека тоа се менува со текот на годините.
„Како што старееш и стомакот ти се зголемува, а јас имам родено три бебиња. Константно морам да работам на љубовта кон тој дел од моето тело. Многу е тешко... Дури и ако вежбаш, а јас постојано вежбам – пешачам, практикувам јога, јадам супер здраво – толку можеш да направиш.“
„Стареењето е навистина интимен едукатор како да се сакаш себеси, бидејќи не можеш да го запреш. Тоа ќе се случи“ – споделува холивудската актерка.
Енди постојано зборува за стареењето, за учењето да се сакаме онакви какви што сме и за природниот изглед. Во интервју во септември минатата година, Мекдауел изјави:
„Мислам дека жените се уморни од идејата дека не можат да стареат и да бидат убави. Мажите стареат и ние продолжуваме да ги сакаме. Сакам да бидам како маж. Не сакам да звучам арогантно, но многу ја сакам мојата коса кога ќе се погледнам во огледалото. Многу е убава“.
