Татко секојдневно ја збогатува својата колекција фотографии, која сведочи за убавината на детската невиност и радост.
Адријан Мари никогаш не ја криел својата страст кон фотографирањето, но вистинската инспирација да започне поредовно да го користи својот фотоапарат дошла по немил инцидент со неговиот син. Едно утро, кога Адријан и неговата сопруга Мишел се приближиле до креветчето на малиот Емерсон, увиделе дека тој воопшто не реагира. Подоцна било утврдено дека станува збор за напади со губење на свеста за што му биле препишани соодветни лекови.
Денес здравствената состојба на Емерсон е одлична, но страшниот инцидент стои во сеќавањата на неговите родители како потсетување на минливоста на животот.
Главни ѕвезди во фотографиите се Емерсон и неговиот помал брат. Целта на посветениот татко е да ја овековечи невиноста во детството, убавината на спонтаноста и едноставноста зад детската среќа.
„Кога ги фотографирам моите деца, сакам да прикажам идеално детство. Кога повеќето од нас се потсетуваат на детството, најчесто им надоаѓа чувство на носталгија. Па, обично ги стилизирам фотографиите за да придобијат винтиџ изглед“ – вели Мари.
