Октомври е месецот посветен на борбата против ракот на дојката. Најчесто во кампањите ракот на дојка е „сокриен“ зад розова панделка. Но, фотографиите на Дејвид Џеј го покажуваат вистинското лице на ракот на дојка, односно физичките и емотивните лузни кои ги остава тој врз женското тело.
„Реалноста не е секогаш убава. Но, ова е реалноста“ – вели Џеј, кој го започнал проектот откако сестрата близначка на неговата девојка заболела од рак на дојка.
Сите жени во „The Scar Project“ се на возраст од 18 до 35 години. Најчесто ракот на дојка се поврзува со жени кои ја минале 40-тата или 50-тата година од животот, па токму затоа една од целите на проектот е да ја зголеми свеста за појавата на рак на дојка кај помладите жени.
Џеј тврди дека фотографиите им помагаат на жените да го прифатат своето тело и да ги прифатат раните од тешката битка. Во неговиот документарен филм „Baring It All“, една од девојките вели: „Лузната го претставува сето она низ кое минав. Горда сум на тоа.“
Во Македонија секоја година има над 750 нови случаи на рак на дојка. Најмладата оперирана пациентка има само 17 години. Редовната самоконтрола и редовните лекарски прегледи овозможуваат рано откривање на ракот со што се зголемуваат шансите за успешно лекување.
