„Стоп за насилството, стоп за насилството врз невини деца“ – тоа цели да го постигне непрофитната организација YGAP со својата кампања „Polished Man“.
Имено, кампањата е создадена за да се подигне глобалната свест за насилството врз децата и да се соберат средства за потпомагање на деца кои станале жртви на физичко и сексуално насилство.
Основачот на организацијата, Елиот Костељо, ја добил идејата за кампањата за време на посета на Камбоџа. Таму ја запознал Теа, 10-годишно девојче кое било физички и сексуално малтретирано. Трогнат од нејзината тажна приказна, решил да преземе иницијатива за да се обиде да стави крај на насилството и да спречи други мали деца да ја доживеат истата судбина.
Елиот почувствувал љубов и игривост во очите на Теа. За време на средбата, таа му ги налакирала ноктите, па поради тоа лакирањето на еден нокт Елиот го постави како симбол на борбата против насилството врз децата.
Шокирани од фактот што 1 на 5 деца е физички малтретирано, мажи од целиот свет се вклучија во кампањата „Polished Man“ или „Налакирани мажи“ во текот на месец октомври.
Славни претставници на посилниот пол, меѓу кои Крис и Лијам Хемсворт и Зак Ефрон, дури и се номинираат (предизвикуваат) еден со друг, за побрзо проширување на добротворната кампања.
Собраните средства се вложуваат во програми за ослободување од траумите како и програми за превенција на траумите кај децата-жртви.