Студентка од Данска ја комплетираше „најголемата сложувалка на светот“, која брои 40.320 парчиња, а е инспирирана од цртаните филмови на Дизни.
Корисничката на Reddit manne0708 е вистинска зависничка од составување на сложувалки и постојано објавува фотографии на социјалната мрежа од своите предизвици. Сложувалката вклучува 10 сцени од Дизни, а е најголемата сложувалка на светот во продажба.
Кога ќе се комплетира, целосната слика е долга 680 сантиметри и широка 192 сантиметри. На упорната девојка ѝ биле потребни 460 часа за да ја заврши.
Претходно, таа објави фотографија на која позира со сложувалката која претходно го држеше рекордот за „најголема во светот“, а за која manne0708 тврди дека била потешка за составување.
Инаку, Гинисовиот рекорд за најголема сложувалка составена некогаш им припаѓа на студентите од Универзитетот за Економија од градот Хо Ши Мин. 1.600 студенти составија сложувалка од 551.232 парчиња на 24 септември 2011 година.