Ќе се заљубите на прв поглед во овој луксузен ресорт на Малдиви кој ќе ве увери дека рајот навистина постои на Земјата.
Сонева Јани (Soneva Jani) се вбројува меѓу најлуксузните ресорти на Малдиви, а е составен од 24 вили на вода и една островска вила на плажа.
Сонева Јани е третото по ред дело од овој тип на брачниот пар Сону и Ева Шивдасани. Познатиот бизнисмен и поранешниот модел исто така се сопственици на луксузните ресорти Сонева Фуши на Малдиви и Сонева Кири во Тајланд. Парот е посветен на зачувување на околината и постојано бара иновативни решенија за користење на еколошки материјали при дизајнирањето на своите вили.
Можеби најголемата иновација во овие вили е што тие имаат покрив што се отвора над спалната соба со едно притискање на копче. Покривот се затвора автоматски пред да заврне, бидејќи има сензори кои детектираат кога доаѓа дожд.
Ресортот има и сопствено кино кое е сместено на плажа, но за да гледате филм морате да носите слушалки за да не ги вознемирувате гостите и животинскиот свет кој живее таму.
Прекрасното место е сместено во лагуна долга 5,6 километри и е одделено од бучавата во надворешниот свет.
