Преку официјално соопштение од Кенсингтонската палата, принцот Хари потврди дека е во врска со американската актерка Меган Маркл и побара да запре „бранот од навреди и малтретирање“ кон неа.
Неколку недели, секој детаљ од животот на 35-годишната ѕвезда од серијата „Suits“ е анализиран и критикуван од медиумите и корисниците на социјалните мрежи, а не се малку и лажните информации кои се пласираат од страна на таблоидите.
Во соопштението на палатата се вели:
„Тој е свесен за големата љубопитност за неговиот приватен живот. Никогаш не се чувствувал пријатно поради тоа и се трудел да развие дебела кожа за нивото на медиумски интерес.“
„Но, во изминатата седмица, се премина линијата. Неговата девојка, Меган Маркл, е мета на бран од навреди и малтретирање. Некои од нив се јавни – оцрнување на насловната страница на национален весник, прикриен расизам во колумни и отворен сексизам и расизам од троловите на социјалните мрежи и во коментарите на статиите на интернет. Некои од нив се скриени од јавноста – ноќните правни битки за да се спречи печатење на клевети во весниците, борбите на нејзината мајка да мине меѓу новинари и фотографи за да стигне до својата влезна врата, обидите на новинари и фотографи незаконски да пристапат до нејзиниот дом и повиците кон полицијата кои следат, обидите на весниците да го поткупат нејзиниот поранешен партнер, бомбардирањето на секој пријател, колега и сакан во нејзиниот живот.“
„Принцот Хари е загрижен за безбедноста на госпоѓица Маркл и е длабоко разочаран што не може да ја заштити. Не е во ред по само неколку месеци од почетокот на врската со него, госпоѓица Маркл да е подложена на ваква бура. Тој знае дека коментаторите ќе речат „ова е цената која таа мора да ја плати“ и дека „ова е дел од играта“. Тој не се согласува со тоа. Ова не е игра – ова е нејзин и негов живот.“
Со ова писмо, принцот Хари бара новинарите да размислат за можните последици пред да биде направена штета.
Меган, која е позната по улогата во ТВ серијата „Suits“, е хуманитарка и поборничка за родова и расна еднаквост. Поддржувајќи ја кампањата World Vision Clean Water, таа неодамна ја посети Руанда.