Алиша Вилијамс е „виновна“ за почетокот на едно необично пријателство помеѓу чивава со две нозе и бушава кокошка. И двете животни биле спасени од сигурна смрт од Алиша, која работи во болница за животни во Далут, Џорџија.
Во последниве неколку дена фотографиите од кокошката Пени и кучето Ру станаа интернет хит и мамат насмевки и мили зборови низ целиот свет.
Алиша прво ја посвоила Пени откако ја видела во лабораторија за експерименти со животни. Кучето Ру било пронајдено во канал. Најверојатно било напуштено од првиот сопственик поради деформитетот. Вилијамс верува дека Ру немало да преживее ако не било спасено таа студена ноќ.
„Пени се возбудува кога Ру е во близина, затоа што знае дека тој постојано има храна. Кога и да слушне дека тој се храни, таа му краде од храната. Тој сака да се гушка со неа, бидејќи таа за него е како големо мече. Понекогаш ја прегазува, затоа што не сфаќа колку се големи неговите тркала“ – раскажала Алиша во интервју за Gwinnett Daily Post.
Алиша има посвоено повеќе спасени животни. „Сите наши животни се чудни животни спасени од многу лоши ситуации“ – рекла таа.
