Кристина и нејзината посвоена ќеркичка Финли, која има церебрална парализа, се неодоливо дуо со специјална врска. Тие секојдневно ја документираат својата приказна преку фотографии и видеа, а нивните обожаватели на Instagram континуирано се зголемуваат.
„Искористи ја твојата НАСМЕВКА за да го промениш СВЕТОТ, не дозволувај светот да ја промени твојата насмевка“ – е нивното животно мото.
Една година откако стапиле во брак, Кристина и нејзиниот сопруг решиле да се обидат да имаат дете. Но, по долги месеци борба со неплодност, таа дознала дека има намалена оваријална резерва и дека дури и да успее да забремени, голем е ризикот да доживее спонтан абортус.
Тогаш, парот решил да си ја оствари големата желба да има дете со посвојување. За кратко време, тие ја добиле среќната вест дека ќе посвојат новороденче.
Биолошката мајка ја родила Финли предвреме, во 31. недела од бременоста со царски рез. Во првите часа од својот живот, новороденчето било во критична состојба и било пренесено на интензивна нега.
Финли била толку мала и нежна што веднаш се вгнездила во срцето на Кристина, која ѝ ветила дека вечно ќе ја штити и ќе ѝ го подари светот.
Поради тоа што било родено предвреме, девојчето доживеало крвавење на мозокот. Докторите им соопштиле на родителите дека Финли има церебрална парализа и дека големи се шансите никогаш да не може да оди самостојно. Загрижениот пар се заколнал дека ќе направи сè што е во негова моќ за да ѝ помогне.
Денес Финли има три години и нејзиното секојдневие сè уште е исполнето со лекови и секакви видови на терапии, а неретко и операции.
„Срцето ми се крши малку по малку секојпат кога ќе побара од мене да ѝ помогнам да стане. Да можам, би ѝ ги дала моите нозе. Како родител, нема ништо полошо од тоа да го гледаш своето дете како страда“ – вели Кристина.
3-годишното девојче, кое обожава да танцува, неодамна минало низ голема операција, која ќе му помогне да има поголема контрола над своето тело и еден ден да се движи без никакви помагала.
Честопати, Кристина и Финли се облекуваат во складни комбинации.
Семејството го слави секој напредок на слаткото девојче. Со споделувањето на својата приказна на интернет, тие целат да ја зголемат свеста за церебралната парализа и да ги охрабрат луѓето да посвојуваат.
