Иванка Трамп деновиве престојуваше во Берлин по повод „Самитот на жените“ (W20). Ова е прво меѓународно патување на Иванка како претставничка на владата на САД, односно во улога на советник на Доналд Трамп.
35-годишната бизнис дама учествуваше во панел дискусија заедно со неколку од најмоќните жени во светот – германската канцеларка Ангела Меркел, холандската кралица Максима и директорката на Меѓународниот монетарен фонд Кристин Лагард.
Фокусот на дискусијата беше поставен на родовата еднаквост, подобрување на економската состојба на жените и зајакнување на нивниот претприемачки дух.
Во неколку наврати, Иванка беше принудена да го брани својот татко, поради неговиот однос кон жените и поточно неговите омаловажувачки коментари кон припаднички на понежниот пол пред да седне во претседателската фотелја.
„Моето лично искуство, и мислам дека илјадниците жени кои имаат работено со и за мојот татко со децении, додека тој беше во приватниот сектор, се доказ за неговото убедување и цврста увереност во потенцијалот на жените и нивната способност да ги извршуваат нивните работи исто толку добро како мажите“ - рече таа.
Иванка присуствуваше и на гала вечера во Deutsche Bank, а го посети и споменикот на Холокаустот во Берлин.