Брајан Адамс доби уникатен подарок по концертот во Скопје.
Македонскиот дизајнер Сатја Грабулоски за него креираше јакна на која рачно беше насликан неговиот лик. Канадскиот пејач го доби оригиналното парче облека по музичкото шоу изминатиот викенд и беше одушевен.
Сатја е познат по изработката на уникатни и оригинални патики за светски спортски и музички имиња како Дуа Липа, Стив Аоки, Мајли Сајрус, а идејата овој пат да направи јакна за Адамс била од мајка му. Тимот на SWithaDot работеше околу 180 часа за да ја реализира замислата на Сатја.
На јакната освен ликот на славниот пејач е испишан и насловот на неговиот најнов сингл Roll Up the Punches.
„Јакната е рачно составена од потврдени вегански материјали, бидејќи Брајан Адамс е веган. Целиот процес на составување, а потоа и на сликање, траеше приближно 180 часа рачна работа на целиот наш тим.“
„Темата на дизајнот е неговиот последен сингл Roll Up the Punches, а идејата да направиме јакна за Адамс, наместо патики, потекна од мојата мајка, која ја обожава неговата музика.“
„Инаку, SWithaDot веќе 6 години за секој истакнат уметник кој ќе ја посети Македонија подготвува Welcome to Macedonia рачно насликан подарок, со идеја да му покажеме дека земјата во која доаѓа го цени, но и да го рашириме талентот на нашите македонски уметници низ светот.“
„Таков беше и случајот со Брајан, чија реакција беше искрена, со огромна насмевка и едно долго WOOOOW. Очекуваме да ја носи на некој од неговите следни настапи“ – рекол Грабулоски.
