Мајка останала со подзината уста кога за време на преглед со ултразвук дознала дека носи четири бебиња во својата утроба.
Но, изненадувањата за Ешли Нес не запреле на веста дека ќе има четворка. Докторката ѝ кажала дека таа носи два пара идентични близнаци, нешто што се случува многу, многу ретко.
Во интервју, 35-годишната фризерка рекла дека е почестена што ѝ се случува нешто толку ретко и додала дека само една на секои 70 милиони жени природно зачнува со два пара идентични близнаци, како неа.
„Буквално седев таму додека таа сè уште ме прегледуваше и се прашував како ќе го направам ова“ – рекла Ешли, која има една ќерка од претходна врска и се грижи за две од трите деца на нејзиното момче.
Бидејќи претходно се борела со неплодност и имала четири спонтани абортуси додека се обидувала повторно да зачне, Ешли мислела дека никогаш повеќе нема да носи живот во себе. Но, животот имал други планови за неа и таа природно забременила со четири бебиња.
„Многу тешко забременив со ќерка ми и имав спонтани абортуси во минатото. Па мислам дека е неверојатно што сум благословена со нешто толку големо.“
„На некој начин прифатив дека сум благословена само со едно дете и ги гледав неговите деца како да се мои. Мислев дека животот ми е комплетен и никогаш не очекував дека ќе имам уште деца. Веста дојде како голем шок“ – открила таа.
И покрај шокот, Нес била пресреќна кога дознала дека ќе има еден пар женски и еден пар машки близнаци.
„Тоа навистина беше благослов по благослов. Си реков дека нема да ги распознавам, дека ќе заборавам кој е кој, дека ќе ми прават трикови. Ова ќе биде лудо. Едвај чекам да видам колку се идентични“ – рекла таа.
