Кејла Монтгомери е инспиративна девојка која не се откажува од трчањето иако по секоја трка се струполува во рацете на својот тренер, бидејќи не ги чувствува своите нозе.
Упорната тинејџерка страда од мултиплекс склероза, заболување кое ја попречува комуникацијата помеѓу нејзиниот мозок, ‘рбетниот столб и нозете. Сметајќи ја својата подвижност за дарба, Кејла тренира напорно затоа што не знае уште колку долго ќе може да ја следи својата страст – трчањето.
Краткото видео „Catching Kayla“, кое ја раскажува животната приказна на Кејла, деновиве инспирира стотици илјади луѓе од целиот свет кои со восхит гледаат на нејзините постигнувања и нејзината решителност.
И покрај тоа што четири години живее со ужасната болест, Кејла успеа да стане една од најдобрите млади атлетичарки. „Кога стигнувам на целта, се чувствувам како да нема ништо под мене. На почетокот на трката сè е нормално, но потоа нозете постепено ми се здрвуваат. Се имам истренирано себеси да мислам на други работи додека се натпреварувам. Но, кога ќе го прекинам движењето, не можам да си ги контролирам нозете и паѓам“ – изјавила таа за The New York Times.
МС е непредвидлива болест и не се знае како ќе продолжи да се развива кај Кејла, па затоа таа го користи секој миг до максимум и ветува дека ќе трча сè додека е способна за тоа.
