Величествена венчаница од Шанел со 480.000 мониста: Дуа Липа ги сподели првите фотографии од свадбата на Сицилија

Свадбените свечености на Дуа Липа со љубопитност беа следени од фановите низ медиумските објави, но досега не беше обелоденета ниту една фотографија од главната прослава која се одржа на Сицилија.

Додека ужива на медениот месец со сопругот Калум Тарнер, музичката ѕвезда сподели моменти од луксузната италијанска венчавка, при што фокусот е на нејзиниот величествен невестински фустан.

Дизајнирана од креативниот директор на Шанел Метју Блези, венчаницата претставува вистинско ремек-дело за кое биле потребни импресивни 1.155 часа рачна изработка во париските ателјеа.

Фустанот со отворен грб е збогатен со неверојатни 480.000 мониста и 25.000 прецизно аплицирани пердуви. Целосниот изглед е заокружен со 6-метарски вел од тул и рачно изработени сатенски чевли од Massaro. Младоженецот носеше костум од Луј Витон.

Самата прослава се одржа во грандиозната Вила Валгуарнера, историско здание од 18 век познато како „малиот Версај“. Меѓу присутните се најдоа звучни имиња како Донатела Версаче, Марк Ронсон и Чарли XCX, а според објавените информации, атмосферата достигнала кулминација со настапот на Елтон Џон, кој ја извел култната „Your Song“. 

Липа и Тарнер склучија граѓански брак на интимна церемонија во Лондон, кога невестата носеше бел комплет од Скијапарели.