„Нема граници за едно големо срце“: Тамара Тодевска пееше за Леон, кој некогаш славеше роденден сам, а сега со голема дружина

Од стравот дека повторно ќе остане сам до роденденска прослава исполнета со музика, насмевки, позитивност и бројни гости. Леон го прослави својот 13. роденден опкружен со добродушни луѓе кои дојдоа да му покажат дека е сакан.

На Школка во Градскиот парк во Скопје се одржа инклузивен настан организиран по повод роденденот на момчето со аутизам, чија приказна допре до многу срца.

Зад иницијативата стои неговата мајка Амела Мемиш Апостоловска, поттикната од разочарувачко и тажно искуство од пред три години. Имено, кога Леон полнел 10 години, ги поканил своите другарчиња на роденден, но тие не дошле, па момчето останало само. Токму затоа, годинава неговиот роденден се претвори во отворен настан со порака за прифаќање, инклузија и другарство.

Меѓу оние кои ја разубавија веселбата беше и Тамара Тодевска. Популарната пејачка настапи на прославата, заедно со присутните ја сподели радоста и му ја отпеа на славеникот „Happy Birthday“.

По настанот, македонската ѕвезда објави фотографии и му упати прекрасна роденденска порака на Леон:

„Нема граници за едно големо срце – среќен роденден Леон 🎂

Твојот роденден нека продолжи да ги обединува сите деца и нека прерасне во една убава скопска традиција ❤️“

Желбата нејзините зборови да станат реалност ја дели и мајката на Леон, која уште пред прославата порача дека се надева оти овој ден можеби ќе прерасне во традиција – ден во кој секое дете ќе знае дека е добредојдено.

На специјалниот ден, Леон изјави: 

„Ние, децата со аутизам, не сме помалку вредни. Зборуваме со очите, со насмевката, со душата. Само треба некој да застане доволно блиску за да нè слушне.“

Само неколку часа пред настанот, Леон сè уште не бил сигурен што го очекува. И покрај сите подготовки, на мајка си ѝ рекол: „Мамо, уште не знам дали ќе дојдат“.

Смеј се Леон, дојдоа!