Обожавателка на Тоше Проески пресреќна што доби винил-плоча од неговото семејство, а го чува и пенкалото со кое ѝ дал автограм
Љубовта кон Тоше Проески за многумина не згасна ни 19 години по неговата смрт. Напротив, неговите обожаватели и денес со истата емоција ги чуваат спомените, песните и секој мал детаљ кој ги поврзува со него.
Обожавателката Ема Тодоровска доби специјален подарок од семејството на Тоше, а радоста од изненадувањето ја сподели со своите следбеници на Instagram. Таа доби винил-плоча од неговиот последен албум „Игри без граници“, која ја фотографираше заедно со автограмот од Тоше што го добила пред многу години.
Подарокот ѝ го испратил Кристијан Ристески, внукот на Тоше, кој на овој начин ѝ приреди изненадување на Ема. Таа уште од 7-годишна возраст ја носи во себе љубовта кон Тоше, а до ден-денес споделува фотографии и спомени од македонската музичка легенда.
„Некои ветувања, се толку искрени и слободни од концептот на времето, што патуваат низ сите димензии и нишки од кои е направен универзумот, и наоѓаат начин да пристигнат баш кога е најпотребно.
'Од сега и засекогаш ќе бидам твој другар' , е токму такво ветување.
Би сакала да можам да опишам колку ми значи овој подарок од семејството на Тоше, но зборовите тука немаат моќ.
Сите верзии на Ема во мене од кога знаат за Тоше, од 7 години до денес, подеднакво силно ја носат љубовта за него. Секој ден.
@kristijanristeski ,ти благодарам од срце и душа 🫂
🫀
П.С. Да, пенкалото на сликата е истото со кое ја напиша посветата. Неупотребувано никогаш од тогаш. ✨“ - стои во нејзината порака.
Тоше почина на 16 октомври 2007 година во Нова Градишка. Имаше само 26 години. Денот на неговиот погреб, 17 октомври, беше прогласен за Ден на национална жалост.