„Државата нема да мрдне со мал прст за врсничките насилства, еве доказ“: Адвокатката Ристова бесна откако беа ослободени од одговорност родителите на тепаното девојчето во Штип
Додека јавноста се уште е вознемирена од бруталното врсничко насилство во скопски Аеродром, за кое полицијата најави кривични пријави против родителите за „запуштање и малтретирање на дете“, случајот од Штип доби поразителен епилог.
Адвокатката Маја Ристова, која го застапува 12-годишно девојче кое со месеци беше мета на физичко и психичко малтретирање, денеска алармираше дека Вишото јавно обвинителство ја отфрлило кривичната пријава против родителите на насилните малолетници, потврдувајќи ја одлуката на Основното јавно обвинителство.
Според образложението на обвинителските органи, родителите не можат да бидат гонети за кривичното дело „запуштање и малтретирање на дете“, бидејќи, според нивните искази, „не биле свесни за дејствијата што ги преземале нивните деца“ и не се согласувале со нив.
Адвокатката Ристова јавно го објави решението од Обвинителството, изразувајќи длабоко разочарување и сомнеж во капацитетот на системот да го сузбие врсничкото насилство.
Во продолжение, ви ги пренесуваме нејзината реакција и клучните делови од образложението на обвинителството:
Еве да видите дека не зборувам на памет кога пишувам дека државата нема да мрдне со мал прст за врсничките насилства, додека не ни се случи Рибникар.
Само што примив Решение од Вишото јавно обвинителство во Штип во кое се вели дека Основното јавно обвинителство во Штип правилно утврдило дека родителите на децата што крвнички тепаа друго дете и тоа неколку пати по ред, не се одговорни за кривичното дело “Запуштање и малтретирање на дете”, затоа што не биле свесни за дејствијата што ги преземале нивните деца. Ејјјј, не биле свесни🙈не ми се верува што читам. Требало да има континуирано и сериозно занемарување, а не ова? Што е ова? Го тепале три месеци, и психички и физички го малтретирале, ништо не е тоа. Требало да го избодат, скраја било.
И ова пази “Фактот што детето самостојно превземало противправно дејствие не може да се квалификува како запуштање или малтретирање🙈
Каква порака се испраќа со ова?
Ако овде нема одговорност, каде имаше и признанија и видео снимки, што со останатите насилства?
