Шокантно врсничко насилство во Аеродром: Девојче на колена моли да престанат да го тепаат, јавноста бара итна реакција
Вознемирувачко видео од скопската населба Аеродром откри брутално врсничко насилство врз малолетно девојче.
На снимката се гледа како девојчето моли да престане насилството додека е опколено од група врсници.
Малтретирањето е со директни понижувања, влечење за коса и удари. Во еден момент се слуша еден од присутните како вели „Ќутете да слушнеме како ќе пука!“, непосредно пред девојчето да биде удрено со силна шлаканица.
Начинот на којшто е изговорена таа реченица е доказ за отсуството на емпатија кај набљудувачите. Наместо да се обидат да го спречат нападот, присутните со мобилни телефони во рацете снимаа сè, претворајќи го страдањето на врсничката во содржина за забава.
Снимката поттикна лавина реакции на социјалните мрежи и граѓаните оправдано бараат итна и остра реакција од институциите.