Талија блесна на премиерата на „15: A Quinceanera Story“. Шармантната актерка и пејачка, која кај нас е позната по улогата на Росалинда во истоимената серија, мамеше воздишки во младешки стајлинг во кој наликуваше на модерна принцеза.
На филмскиот настан, 46-годишната Мексиканка се појави во впечатлива црвена креација од ателјето на дизајнерот Чарбел Зое. Стилскиот избор таа со надополни со чантичка од Џудит Либер и сандали од сопствената колекција.
Талија беше придружувана од својот сопруг Томи Мотола, со кого е во брак 17 години.
„15: A Quinceañera Story“ е колекција од четири филма, продуцирани од Томи, а режирани од Талија и Метју О’Нил.
Парот со слатки видеа од специјални моменти од своите животи си ја честиташе годишнината од бракот.
„Пред 17 години, во студена декемвриска ноќ, нашите соништа станаа реалност и ние се заколнавме дека ќе се сакаме засекогаш. Среќна годишнина љубов моја! Те сакам“ – напиша Талија.
„Среќна годишнина. Јас сум најсреќниот маж на светот што го имам овој ангел!“ – напиша Томи.
