Луѓето кои живеат во домови за старци се често многу осамени и со нетрпение очекуваат посетители. Случајот на Лизи Пикен е уште потажен поради тоа што оваа старица никогаш не се омажила, ниту, пак, има деца.
Вработените во старечкиот дом во Англија решиле да направат добро дело и да ја изненадат за нејзиниот јубилеен роденден, па затоа објавиле повик на социјалните мрежи и замолиле на Лизи да ѝ бидат испратени 100 честитки за нејзиниот стоти роденден. Тие, а уште повеќе и самата Лизи, биле пријатно изненадени кога 638 луѓе одговориле на повикот, а покрај честитките пристигнале и пакетчиња со роденденски подароци.
Кога ѝ биле однесени купишта пликови и подароци, на нејзината радост ѝ немало крај. Вкупно 638 странци со топли зборови ѝ посакале убави желби и ја поздравиле Лизи. „Ова е и повеќе од љубезно. Секој момент од животот е скапоцен и јас сум екстремно среќна со мојот. Многу сум благодарна“ – вели старицата по овој повод.
Нејзиниот јубилеен роденден поминал прекрасно. Покрај тоа што Лизи била пресреќна додека ги читала честитките, добила и неколку посетители од своето пошироко семејство, а се појавила и нејзината најдобра другарка Лесли. „Таа има направено многу за да ме одржи здрава бидејќи порано пушев како оџак“ – се шегува Лизи. Единствено нејзината сестра не можела да присуствува на овој голем ден бидејќи таа има 103 години и живее во Шкотска. Сепак, сестрите редовно контактираат.
Идеја за ваква хумана постапка добила Џеки Тоуп, менаџерката на домот за старци. Кога слушнала дека Лизи е возбудена за стотиот роденден, таа ѝ предложила на старицата да се објави повик за роденденски честитки. Лизи се согласила, но сѐ до нејзиниот роденден не ѝ било кажано колку честитки пристигнале.