Патувачките афинитети на Карол Левандовски и Александра Шлусарчик не се поклопувале со нивниот заеднички буџет. Сепак, младиот пар од Полска решил да не се откажува од своите соништа поради недостатокот на финансиски средства и разработил стратегија за патување со ограничен буџет.
28-годишните авантуристи досега имаат посетено над 50 држави со дневен буџет од околу 415 денари, а нивниот динамичен стил на живеење трае веќе 6 години. Фотографиите од патувањата низ светот парот ги објавува на заедничкиот блог „By Bus Around The World“, а фотографиите се придружени со совети за оние кои сакаат да се нафатат на сличен патувачки подвиг, но сè уште не се доволно храбри.
Кратко време откако се венчале, Карол и Александра отпатувале на меден месец во Алјаска и со тоа започнал нивниот експеримент. Младенците тргнале на пат со своето комбе, а за нивното патување да трае подолго, се откажале од престои во хотели и јадење во ресторани.
Патувањето во Алјаска се покажало како прекрасно искуство и затоа парот решил да отпатува повторно. Така започнал нивниот пат околу светот со заедничкото хипи комбе, кое било преполно со прехранбени намирници поради желбата да заштедат за храна.
Дел од нивниот авантуристички потфат било честото ноќевање во шатор под отворено небо, а понекогаш добивале шанса да преноќат кај локални жители на местата кои ги посетувале. Што се однесува до патните трошоци, Карол и Александра смислиле одлично решение. Покрај тоа што земале со себе патници за да ги поделат трошоците за гориво, тие испраќале и разгледници до секој кој за возврат ќе им плати литар гориво.
„Кога ни требаше помош од механичар, често не сакаа да ни земат пари бидејќи беа импресионирани од нашите патувања, сакаа да ни помогнат и да бидат дел од нашата авантура“ – вели Карол.
Заљубените авантуристи ги охрабруваат сите што сакаат да патуваат да го следат нивниот пример. „Кога луѓето слушаат за нашите патувања, често велат дека отсекогаш сакале да направат нешто такво и дека би сакале да бидат како нас, но никогаш не се осмелиле. Сметаме дека тоа е поради нивниот страв и стереотипите за ваквиот начин на патување, поради што луѓето само си бараат изговори за да не обидат во нешто слично“ – велат тие и истакнуваат дека ваквите патувања имаат многу предности, како на пример запознавањето нови луѓе.
