Омар Тејлор успеа да се избори со КОВИД-19 и излезе од болница точно за вториот роденден на неговото синче.
31-годишниот татко од Англија имаше сериозни здравствени компликации поради коронавирусот.
Тој 30 дена бил ставен во индуцирана кома и приклучен на респираторна машина, преживеал два мозочни удари, сепса и двојна пневмонија. Но сега, може да се радува што повторно се врати кај своето семејство.
Тејлор беше испратен од болница со аплауз од страна на здравствените работници, а надвор од здравствената институција, дочекан со топли прегратки од неговите две деца и сопругата.
ВИДЕА:
Додека Омар бил во кома, неговата сопруга Кејтлин се подготвувала за најлошото, поради прогнозите кои ѝ ги соопштувале докторите. Затоа, опоравувањето на нејзиниот сакан таа го смета за чудо. „Прво ни рекоа дека ќе умре, потоа ни соопштија дека никогаш нема да може да оди. Неговото опоравување е апсолутно чудо“ - рекла таа.
Моментот кога Омар излезе од болница, Кејтлин го опишала како поубав дури и од нивниот свадбен ден.
„Мислевме дека кога Омар ќе излезе од болница, ќе биде во инвалидска количка, но тој излезе чекорејќи и ние бевме изненадени. Тоа беше најубавото чувство кое го имам почувствувано во мојот живот. Искрено можам да кажам дека беше подобро од нашиот свадбен ден, подобро од деновите кога се родија нашите деца. Сметам дека се чувствував така бидејќи не мислев дека е возможно. Но, сега сме тука сите заедно како семејство“ – изјавила Кејтлин.
Омар беше топло пречекан и од нивните соседи.
Поради бројните компликации, Омар има проблеми и со зборувањето, но се очекува неговиот говор да се подобрува од ден на ден.
