Дождот и силниот ветер не беа пречка вчера вечерта да биде одржано доделувањето на Првите балкански музички награди. Претставници од 11 држави се натпреваруваа за да освојат што повеќе гласови на повеќемилионската публика.
Свечената манифестација се одржа на плоштадот Александар Батенберг во Софија, а беше организирана главно од телевизијата Балканика и општината на град Софија.
Песната „Љубави“ на Жељко Јоксимовиќ ја освои големата награда „Песна на Балканот за 2009 година“. Македонски претставник во оваа категорија беше Каролина Гочева со песната „Крај“, која што ја изведе заедно со раперот Sky Wikluh.
Победничка во категоријата „Најдобра изведувачка“ е Турчинката Хадисе, а наградата за „Најдобар изведувач“ ја освои Жељко Јоксимовиќ.
За „Најдобар спот на Балканот“ беше прогласен спотот на Ана Виси од Грција, која воедно ја доби и наградата за „Придонес за развивањето и популаризирањето на музиката на Балканот“.
Романската група Akcent ја освои наградата во категоријата „Најдобар дует/група“.
