Викторија Бекам денес ја започнува шестата деценија од својот живот.
Успешната бизнисменка и модна дизајнерка, која во минатото се прослави како една од членките на женската група Spice Girls, наполни 50 години. Нејзиниот сопруг Дејвид Бекам, како и секогаш, не пропушти да го одбележи овој ден со пост на социјалните мрежи.
Тој сподели видео составено од кадри од животот на Викторија и нејзини фотографии.
„Среќен роденден на мојата убава сопруга. Како што наближува својот роденден, треба да погледнеш наназад и да се гордееш со она што го постигна, достигна и изгради. „Posh Spice“, бизнис жена и се разбира, стапување во брак со капитенот на Англија. Но, твојот најголем успех се твоите деца. Ги насочуваше, ги сакаше и ги учеше. Тие те сакаат повеќе отколку што може да се опише со зборови. Сите те сакаме и заслужуваш сè. 50 и фит“ – напиша тој.
Викторија сподели своја фотографија и напиша:
„Додека се подготвувам да зачекорам во 50-ката (на потпетици, се разбира), се чувствувам неверојатно благословена што го достигнувам овој јубилеј. Благословена, но исто така реализирана и длабоко задоволна. Не само со местото каде што сум како жена, но колку далеку стигнаа моите брендови за мода и убавина. Моја амбиција отсекогаш била да ги охрабрувам жените и да правам да се чувствуваат како најдобрата верзија од себеси.“
„Верувам дека можеш да бидеш многу нешта. Поп ѕвезда, мајка, сопруга, дизајнерка... Мојата страст отсекогаш била да сонувам големи соништа, а потоа уште поголеми! Најпрво верувај во себе, а сите останати ќе те следат. И ако си навистина среќна, ќе пронајдеш некој кој верува во тебе повеќе одошто ти самата. Дејвид Бекам, засекогаш сум благодарна за твојата безусловна љубов и поддршка, како и за нашите преубави деца. Бруклин, Ромео, Круз и Харпер, вие ме правите комплетна. Горда сум и восхитена од љубезните, трудољубиви, талентирани индивидуи коишто станувате“.
Викторија и Дејвид стапија во брак во 1999 година и заедно имаат четири деца.