Вини Харлоу: Од исмејувана девојка поради дамките на кожата до модел на Victoria's Secret

Понекогаш соништата навистина стануваат реалност. Синоќа, се исполни најубавиот сон на Вини Харлоу и таа стана првиот модел со витилиго во историјата на Victoria’s Secret.

24-годишната девојка самоуверено зачекори на модната писта на ревијата на брендот за долна облека, докажувајќи им на сите дека она што не нè убива, навистина нè прави посилни.

Вини, чие вистинско име е Шантел Браун-Јанг во минатото била исмејувана и навредувана поради белите дамки на нејзината кожа. Додека растела, таа била нарекува со погрдни зборови, но и покрај тоа, таа не дозволила да биде уништена нејзината самодоверба.

„Растењето беше екстремно тешко за мене. Ме задеваа и бев исмејувана заради мојата кожа. Ме нарекуваа крава, зебра, милки, наведете каква било навреда, јас ја добивав“ – изјавила таа во минатото.

Во еден момент таа и помислувала на самоубиство. „Не можев да го поднесам стресот. Но дали мојата кожа беше виновна за тоа? Не, туку мојот никаков став кон неа. Ако ја прифатев и започнев да се однесувам кон себе како што заслужувам, немаше да биде важно што велат другите затоа што ќе се сакав себеси... Па, токму тоа и го направив. Се сакав себеси и со тоа многу можности започнаа да паѓаат во мојот скут и му благодарам на Господ за тоа. Трудете се да се сакате себеси“ – рекла таа.

Вини е инспирација за многу девојки низ светот и е доказ дека упорноста секогаш се исплаќа.