Тамара Тодевска прогласена за Најдобар женски изведувач на Евровизија, „Proud“ е на петто место за Најдобра песна

Овогодинешното поглавје на Евровизија е пред својот крај, но сè уште се коментираат и оценуваат настапите на артистите. Така, радиото ESC (Eurovision Song Contest) секоја година ги повикува фановите да гласаат за нивните евровизиски фаворити во четири категории.

Тамара Тодевска застана на врвот на листата на Најдобри женски изведувачи. Зад македонската пејачка се Кејт Милер од Австралија и Тамта од Кипар.

Нашата балада „Proud“ пак се најде на петтото место на Најдобра песна 2019. Водечката позиција е за „Arcade“, која воедно беше и победничка композиција на фестивалот.

Лука Хани од Швајцарија е победник во категоријата Најдобар машки изведувач. За него гласале повеќе обожаватели одошто за второпласираниот Данкан Лоренс, кој всушност беше големиот победник на Евровизија.

Keiino од Норвешка е Најдобра група додека Hatari од Исланд се втори на истата листа.