Србинот кој висеше од авион над Македонија ќе бара милионска отштета, патничка раскажа за ужасот: „Сè уште ме прогонува“

Љубиша Каровиќ, кој преживеа драматичен инцидент над Македонија, подготвува правна постапка за која се очекува да биде тешка десетици милиони евра.

61-годишниот Србин на 10 јули патувал со летот на Ryanair од Солун кон Меминген со сопругата Светлана кога делови од моторот го оштетиле трупот на авионот и го скршиле прозорецот до неговото седиште.

Поради наглата декомпресија, главата и рамената на Љубиша биле извлечени низ отворот, додека сопругата очајнички го држела за нозете за да не биде извлечен целосно од авионот.

Според сведоштвата, драмата траела околу пет минути. Други патници помогнале Каровиќ повторно да биде внесен во кабината, а авионот принудно слетал во Солун.

Елени Кирану (33) била меѓу патниците кои со сите сили го држеле Каровиќ.

„Го направив она што можев за да му помогнам на човек, да спасам живот. Но, сето тоа сè уште ме прогонува. Сликите и звукот останаа во мене“ – изјавила таа во емисија.

Србинот претрпел сериозни повреди. Имал изгореници на лицето, а извесен период имал проблеми со движењето на десната страна од телото. Лекарите предупредиле дека можеби ќе биде потребна операција. По инцидентот морал да носи и заштитна Шансова кравата околу вратот.

Засега не е донесена конечна одлука против кого точно ќе биде поднесена тужбата. Како можни одговорни страни се разгледуваат Ryanair, Boeing, производителот на моторот CFM International, како и компании задолжени за одржување на авионот.

Во меѓувреме, извршниот директор на Ryanair ги отфрли тврдењата дека Каровиќ бил извлечен од авионот, оценувајќи ги како „бесмислени“. 

На тоа адвокатот одговорил дека околу 70 патници биле сведоци на случувањата и дека, доколку Каровиќ не бил врзан со појас, најверојатно немало да преживее.

„Среќник сум. Не се сеќавам на многу работи. Главата и вратот сè уште ме болат, но жив сум. Можеби ме спаси тоа што бев врзан со појасот. А можеби беше судбина. Верувам во Бог и секој ден му благодарам“ – рече Љубиша неодамна.