Јана Бурческа внесе доза на модна смелост на свеченото отворање на „Браќа Манаки“.
Како дел од екипата на Македонската радио-телевизија која ја пренесуваше фестивалската атмосфера, познатата пејачка се појави пред камерите во впечатлива кожена креација со потпис на македонскиот дизајнер Занов.
Наместо конвенционална вечерна тоалета, Бурческа избра фустан со прецизно дефинирана силуета и деколте без прерамки. Интензивната нијанса беше надополнета со метални алки и врзувања распоредени во правилни хоризонтални линии по целата должина, внесувајќи суптилна индустриска естетика во дизајнот.
Особена модна тежина на стајлингот му дадоа долгите црни кожени ракавици. Нивниот драматичен контраст со фустанот ја нагласи конструкцијата на целината, а црните шпиц-чевли ја продолжија прочистената линија без да му конкурираат на главниот дизајнерски момент.
Со микрофонот во рака и задача да ја пренесе атмосферата од свеченото отворање за гледачите на МРТ, Бурческа истовремено создаде и еден од модните моменти кои го задржаа погледот пред објективите.
Фото: Ивона Кочов, Александар Василевски / Femina.mk