„Сакајте си го телото по породувањето“: Жени го слават реалниот изглед на телото на мајките

Секојдневно сме преплавени со фотографии од модели и жени кои за рекордно време успеале да се вратат во форма по породувањето. Многу нови мајки чувствуваат притисок брзо да си го вратат телото кое го имале пред забременувањето и се чувствуваат ужасно доколку не успеат во својата намера.

Фотографката Микаела Бодкин има друга цел – да покаже како реално изгледа телото на мајките по породувањето и да ги охрабри жените да се сакаат себеси онакви какви што се. Нејзиниот фотосеријал „Love Your Postpartum“ прикажува мајки, кои гордо и без фотошоп го покажуваат телото кое ги создало нивните деца за да инспирираат и други мајки.

Бодкин била поттикната да го сними серијалот откако една мајка ѝ рекла дека сака да сними фотосесија за да прослави за новото тело по породувањето. Преку оглас на Facebook кој станал вирален хит, таа ги пронашла и другите учеснички во проектот.

„Сакам да ги охрабрам мајките да си го сакаат своето тело по породувањето“ – вели Микаела.

„Целата моја работа се врти околу тоа да се сакаш себеси и да се чувствуваш убава. Раѓањето бебе е голем животен чекор, проследен со многу промени. Сакам мајките никогаш да не се чувствуваат како нивното тело да не е толку убаво како што било некогаш. Сакам мајките да ги прегрнат промените низ кои минува нивното тело за да ги донесе на свет нивните бебиња“ – додава таа.