Жените можат значително да го намалат ризикот од појава на рак на дојка преку редовна физичка активност, велат научници од Универзитетот Северна Каролина.
Резултатите од ново истражување покажале дека дури и најмалата редовна физичка активност го намалува ризикот од рак на дојка со 6%. Сепак, најголемо редуцирање на ризикот има кај жените кои вежбаат по 10-19 часа неделно.
За да дојдат до овој заклучок, научниците споредувале 1.500 жени без рак на дојка со 1.550 жени кои имале рак на дојка и биле дел од проектот „Long Island Breast Cancer Study Project“. Било откриено дека жените кои вежбале за време на репродуктивните години и во годините по менопаузата, имале намален ризик од развивање на рак на дојка. Позитивниот ефект бил најзабележителен кај жените кои вежбале 10-19 часа неделно (по 2 часа пет пати седмично) и кај нив намалувањето на ризикот изнесувало до 30%.
„Бев возбудена од резултатите бидејќи како што стареат жените, си ги зацврстуваат навиките и си велат штом не бев активна цел живот, зошто да започнувам со вежбање сега. Но, важно е да се покаже дека има докази поткрепени од истражувања кои велат дека можете да започнете со вежбање и по менопаузата и сепак да имате големи бенефиции од тоа“ - изјавила Лорен МекКалоу, авторката на истражувањето.
Но, додека вежбањето помага, дебелеењето е непријател на женското здравје. Лорен МекКалоу објавила дека зголемувањето на телесната тежина е фактор кој придонесува за зголемување на ризикот од рак на дојка.
Истражувачите потсетуваат дека здравата тежина е резултат на баланс помеѓу вежбањето и исхраната, односно дека покрај физичката активност, многу е важно да се преферира здравата исхрана.