Новак Ѓоковиќ се сретна со новинарот кој го расплака по освојувањето на олимписки медал: „Не го прави тоа уште еднаш“
На доделувањето на престижните Лауреус награди во Мадрид, Новак Ѓоковиќ покажа зошто е миленик и надвор од тениските терени.
Српскиот ас блесна во улога на водител, заедно со олимписката шампионка Ејлин Гу, но еден неочекуван момент на црвениот тепих го украде вниманието на јавноста.
Новак препозна шпански новинар кој претходно го расплака за време на Летните олимписки игри 2024 во Париз. Средбата започна со насмевка, но и со шега:
„Ти си оној што ме расплака? Ќе ме расплачеш пак? Не го прави тоа повторно... имам шминка“ – му порача Ноле низ смеа.
Станува збор за емотивен момент кога новинарот му покажа фотографија од неговото детство и неговите први чекори во светот на тенисот непосредно по освојувањето злато на Олимпијадата. На фотографијата беше 4-годишниот Новак со рекет во рака на Копаоник. Токму таа слика му ги насолзи очите на Ѓоковиќ.
„Тоа беше навистина посебен момент. Ме потсети на првите чекори во тенисот и на долгото патување зад мене. Благодарен сум за сè“ – изјави тој.
