Нов моќен настап на струмичанката Тина во германскиот „The Voice“ како роденденски подарок
Тина Русева продолжува да ги освојува симпатиите на публиката и жирито во музичкото шоу „The Voice of Germany“.
Младата пејачка од Струмица настапи во втората фаза од натпреварувањето и од музичката битка со уште две натпреварувачки излезе како победник, освојувајќи место во тимот на судијата Нико Сантос.
„Некои родендени доаѓаат со торта. Мојот дојде со сцена, светла, микрофон и битка“ – напиша Тина на социјалните мрежи, прославувајќи го својот 21-ви роденден токму на денот на настапот.
Со енергична и самоуверена изведба на легендарната песна „Walk This Way“ од RUN DMC и Aerosmith, Тина ја покажа својата препознатлива моќ и харизма на сцена. Победата ја опиша како најубав роденденски подарок што можела да го посака.
Видео од настапот
Во публиката беа и нејзини блиски, меѓу кои и гордата мајка Верица, која подоцна сподели видео на кое Тина ги дува свеќичките на роденденската торта.
Тина, која на аудициите направи вистински спектакл со динамичната изведба на хитот „Do It Like a Dude“ од Џеси Џеј, веќе неколку години живее во Леверкузен, Германија, каде го гради својот музички пат со огромна посветеност и талент.