Струмичанката Тина Русева приреди вистински спектакл на аудициите на германското музичко шоу „The Voice of Germany“, освојувајќи ги и жирито и публиката.
Со својата уникатна и енергична изведба на хитот „Do It Like a Dude“ од Џеси Џеј, Тина буквално ја раздрма сцената и доби стоечки овации. Членовите на жирито ѝ порачаа дека токму таков изведувач чекале и ѝ предвидоа блескава музичка иднина.
Видео од настапот на Тина
Тина, која потекнува од Струмица, веќе неколку години живее во Леверкузен, Германија. Со музика се занимава од најрана возраст, а љубителите на добриот звук ја познаваат и по нејзините бројни кавери на YouTube.
По настапот, таа сподели и емотивна објава на Инстаграм, посветена на својата детска верзија и на музиката што отсекогаш ја водела:
„Драга музико, ти беше мојот таен јазик кога немав зборови, мојот невидлив пријател во тишината, мојата сила во секоја бура и мојата радост во секоја насмевка. Никогаш не замина кога сè друго замина. И еве, токму ти ме донесе на големата сцена на 'The Voice of Germany'. Но, не во која било сезона! Ова е јубилејната 15-та сезона, прослава на сите ѕвезди, легенди и незаборавни гласови. А јас го заслужив своето место меѓу нив. Благодарам што никогаш не ми дозволи да чекорам сама. Ова е за тивката мечтателка која се осмели да пее гласно и за четиригодишната јас која четката за коса ја претвораше во микрофон и пееше како целиот свет да слуша. ТИ УСПЕА!“
