Џеси Џеј ги израдува фановите со споделувањето на позитивната вест дека го победи ракот.
Во споделеното Instagram видео, британската пејачка документира редовен преглед и признава дека магнетната резонанца многу ја плаши, но дека иако е клаустрофобична, мора да лежи мирна „како Супермен“.
Во описот на објавата, славната музичарка ги соопшти среќните вести:
„Резултатите пристигнаа и јас немам рак. Плачев со часови, а потоа за првпат по една година длабоко издишав.“
Џеси Џеј во јуни минатата година јавно откри дека ѝ бил дијагностициран рак на дојка, по што веднаш била подложена на операција. Неколку месеци подоцна, мораше да откаже и дел од концертите од својата турнеја, бидејќи ѝ беше потребно дополнително лекување.
Музичката ѕвезда тогаш истакна дека решила јавно да зборува за својата болест за полесно да се соочи со неа, но и за да им даде поддршка на сите кои минуваат низ слична борба. „Морам да го процесирам и да зборувам за ова. Ми треба прегратка“, им порача тогаш на фановите.
Ѕвездата, која во 2023 година стана мајка на синот Скај, призна дека токму ова тешко искуство ѝ донело поинаков поглед кон животот и ѝ дало нова сила.
Низ годините, Џеси Џеј отворено зборуваше и за други здравствени предизвици. Таа се соочуваше со срцева слабост уште како дете, преживеа мозочен удар во тинејџерските години, а во 2020 година претрпе привремено губење на слухот поради Мениерова болест. Минатата година откри и дека има АДХД (ADHD) и ОКП (OCD).
Инаку, 38-годишната пејачка, која зад себе има многубројни глобални хитови, го објави својот најнов албум „Don't Tease Me With A Good Time“ во ноември 2025 година.