Мајка од Македонија создава креативни оброци за синчето да се храни здраво и да ужива во јадењето

Креативна мајка од Скопје ги развеселува оброците на малото синче за тоа да се храни здраво и да ужива во јадењето.

Бојана Митрикеска по професија е економист, а обожава да минува време во кујната со 4-годишниот син Максим и заедно да создаваат вкусни и забавни креации од храна. Преку заедничкото декорирање на чиниите, таа го учи синчето на правилниот избор на храна и на важноста на здравата исхрана „за тој да порасне голем“.

„Тоа мало плавооко гурманче, уште кога почнавме со пробување на вкусови и воведување на оброци, отвори еден нов свет во мене, кога зборувам на тема готвење. Сфатив дека јас, како мајка, морам да го научам на правилниот избор на храна и како расте, да му го покажувам тој патоказ неуморно, за да расте здраво и правилно.“

„За среќа, имам благодарно дете кое и од многу мало почна само да јаде, но го поминав и јас тој хаос со комбинации на храна, омилени и помалку пожелни на маса, повторувајќи по не знам колку пати на ден што е правилно, а што не; што е здраво за да порасне голем“ – изјави Бојана за Femina.mk.

Таа започнала да ја декорира храната откако со Максим направиле човече од кора од портокал за работилница во градинка и сега го користи секое слободно време за да создаде нова креативна чинија за Максим.

„И почнавме еден ден да правиме човече од кора од портокал, за работилница во градинка, првиот момент од „Игра со храна“... Не верував дека имам трпение за сите тие сецкања и украсувања, но и мислев дека одзема кој знае колку време. Не било така. Од желбите на Максим со помош од интернет успеав и успевам да направам нешто интересно во тањир. Насмевката и среќата кога ќе ги види ми даваат уште поголема инспирација за секое следно слободно време да биде поуспешен креативен оброк“ – објаснува Бојана.

„Прво почнав со шарени прибори, интересни тањирчиња, за да не биде храната само оброк кој треба да се изеде од навика, туку со уживање. Како расте, така сè повеќе уживам да готвам, гледајќи како со задоволство ги бира здравите намирници, правејќи ја насмевката на мама се поголема.“

„Максим е секогаш до мене кога креирам, работиме заедно создавајќи една нова приказна, учиме форми, бои, витамини... како растат овошјето и зеленчукот“ – вели таа, додавајќи дека е пресреќна што нејзиниот син попрво би избрал риба и брокула одошто сувомеснати производи.

„Сувомеснати производи до ден-денес не сака да погледне, но лук, риба, брокула и спанаќ би јадел секој ден. Јас сум среќна мајка, покрај сите прошетки на сонце и чист воздух, уживам и во слободните мигови потрошени во кујна.“

Бојана им се заблагодарува на администраторите на Facebook групата „Здрава храна, здрави деца“, од каде секојдневно црпи идеи и каде ги објавува своите забавни креации од храна.

„И едно големо БЛАГОДАРАМ за Весна Ѓурковска Каеска еден од админите на ‘Здрава храна, здрави деца’ за секоја споделена идеа, како и до Ирина Наков и Елена Петковска и нивниот ‘Бебе готвач’. Тие ги направија коцките, ние само ги склопуваме“ – вели таа.

Бојана и синот Максим