Лина Ѓорческа со историски пласман на Вимблдон: „Доаѓам од мала земја, но имаме огромно спортско срце!“

Лина Ѓорческа испиша историско поглавје во македонскиот спорт. Нашата најуспешна тенисерка е првата Македонка која обезбеди пласман на главниот турнир на престижниот Вимблдон!

„Доаѓам од мала земја и горда сум што сум единствената во историјата, и во машка и во женска конкуренција, која се избори за место на главниот турнир. Ова за мене е остварување на сонот.

Тоа што доаѓам од мала земја не е лесно, околу комплетната логистика, тренинзите, условите, секако и парите. Но, кога си тука, даваш 100% за да успееш, па на крајот сето тоа носи резултат. Можеби доаѓам од мала земја, но секако имаме огромно спортско срце“, изјави таа по големиот триумф.

Всушност, ова е првпат наш спортист да се натпреварува на турнирот во поединечна конкуренција. Досега, само Александар Китинов имаше настапи на Вимблдон, но во игра на двојки.

Картата за Лондон, Ѓорческа ја завери откако ја победи фаворизираната Италијанка Лусија Бронцети со 2:0 во сетови (6:1, 6:2) за 73 минути доминантна игра.

На патот до главната ждрепка, Лина претходно ги елиминираше и Фита Болуда од Шпанија, како и Хорхе од Португалија.

Покрај спортскиот подвиг, Ѓорческа ја оствари и најголемата заработка во својата кариера. Самото учество во главниот турнир ѝ носи загарантирани 80.000 британски фунти, односно околу 100.000 американски долари.

Противничката за својот историски прв Грен слем натпревар Лина ќе ја дознае утре во 11:00 часот, за кога е закажана официјалната ждрепка во Лондон.