Кетрин Зета-Џонс гламурозна во креација од Зухаир Мурад на церемонијата на ФИФА во Лондон

Појавувањето на Кетрин Зета-Џонс на церемонијата на ФИФА во Лондон беше вистинско изненадување. 48-годишната актерка присуствуваше на годишниот спортски собир организиран од Меѓународната фудбалска федерација и ја презентираше наградата „Ференц Пушкаш“ за најдобар гол на годината.

Велшката актерка го пренесе гламурот од холивудскиот црвен тепих на церемонијата на ФИФА, каде зачекори во долга, полупроѕирна, сребрена тоалета на либанскиот дизајнер Зухаир Мурад од колекцијата есен 2017. Гламурозниот фустан кој го избра актерката е составен од чипкан горен дел и кадифено здолниште. Тоалетата со висок шлиц и еден ракав, актерката ја комбинираше со минималистички накит и сандали во боја на шампањ од познатиот дизајнер на обувки Стјуарт Вајцман.

Актерката, заедно со уругвајскиот фудбалер Диего Форлан, ја додели наградата „Ференц Пушкаш“, која Меѓународната фудбалска федерација ја доделува за најдобар гол на годината. Оваа награда годинава му припадна на играчот на Арсенал Оливие Жиру, а наградатата за најдобар фудбалер за минатата сезона повторно ја понесе Кристијано Роналдо.