Министерот за здравство Венко Филипче соопшти дека денес Институтот за јавно здравје регистрира 16 оздравени пациенти.
Во изминатите 24 часа, направени се 512 тестирања, а регистрирани се 19 нови случаи на КОВИД-19 и тоа во: Скопје (11), Куманово (2), Прилеп (1), Тетово (1), Велес (1), Гостивар (1), Струмица (1) и Виница (1). Досега во земјата се направени вкупно 22.767 тестирања на КОВИД-19.
Од вкупниот број направени тестови во изминатото деноноќие 223 теста се во рамките на скринингот во градинки и нема позитивни. Од досега направените 1.131 тестирања на вработените во градинките потврден е само еден позитивен случај во Битола.
Во ГОБ „8 септември“ почина пациентка од Скопје (65г) примена на 11 мај, пациент од Скопје (71г), хоспитализиран на 16 мај и пациент од Тетово (73г) во болница од 11 мај. На Клиниката за инфективни болести и фебрилни состојби почина пациент од Прилеп (41г) кој повеќе од 40 дена се лекувал на клиниката.
Вкупната бројка на дијагностицирани со КОВИД-19 во нашата земја од почетокот на епидемијата изнесува 1.858, бројката на оздравени пациенти е 1.367, на починати е 110, а во моментов бројот на активни случаи во земјата изнесува 381.
