Во срцето на Србија, во Нови Сад, чевларот Александар Брачер создава уникатни чевли какви што светот досега нема видено.
Од детска желба до реалност која фасцинира дури и на пистите во Париз, негово дело се луксузни чевли од јаглеродни влакна, злато и порцелан, кои се продаваат по цена од 17.000 евра по пар.
„Како вљубеник во спортските автомобили и моторите, дојдов до идеја да направам штикла од карбон. Тој материјал инаку е познат во автомобилската индустрија по својата цврстина и леснотијата. Се покажа дека никој дотогаш во светот немал направено штикла од карбон, па одлучивме да бидеме први“ – рекол Брачер.
Ѓонот и рабовите на чевлите се позлатени со фино злато од 23,75 карати, детаљ кој внесува сјај со секој чекор. Порцеланот, рачно изработен и украсен со злато, додава ретка естетика и деликатност на изгледот. Штиклата од јаглеродни влакна, инспирирана од инженерството и моторите, е уникатен симбол на сила и софистицираност.
Процесот на дизајнирање и изработка на обувките од брендот „Alesari“ траел повеќе од пет години, при што само развојот на штиклата траел цели две години, со бројни тестирања и предизвици, како и потрошени десетици илјади евра.
Првичната замисла била цената на штиклите да биде околу 4.000-5.000 евра, но користењето на ексклузивни материјали ја зголемило вредноста на овие чевли до 17.000 евра.
„Секој пар е уникатен и се прави по мерка. За изработка на еден пар потребни се помеѓу три и шест месеци“ – објаснил Александар.
Чевлите веќе привлекоа внимание во Дубаи и на Париската модна недела, каде беа топло пречекани од модните експерти.
