„Нинанајна“ ечеше во Битола и ја размрда публиката на платото пред Офицерскиот дом. Во рамките на спектаклот „Силно светнал ден“, настапи и Елена Ристеска, која енергично ја изведе евровизиската песна од 2006 година.
40-годишната пејачка пееше облечена во краток црн топ и широко здолниште со миди должина, а монохроматскиот стајлинг го освежи со повеќеслојно виолетово ланче и салонки во иста нијанса. Косата стилизирана во меки бранови и шминката со виолетови тонови идеално се вклопија во женствениот сценски изглед.
Видео
„Силно светнал ден“ се одржува по повод 35-годишнината од независноста на Македонија и претставува музичко-сценско патување низ различни периоди од македонската историја, култура и уметност.
Проектот, во режија на Дејан Пројковски, ги обединува музиката, театарот и поезијата, а низ приказната публиката ја води Игор Џамбазов во улога на домаќин и раскажувач.
На сцената нему му се придружуваат повеќе од 30 македонски изведувачи од различни генерации и музички жанрови, кои преку добро познати песни и сценски изведби ја слават Македонија и нејзиното музичко наследство.
По премиерата на стадионот „Билјанини Извори“ во Охрид, Битола беше втората станица на „Силно светнал ден“, а денес проектот патува до Велес.
Фото: Ивона Кочов / Femina.mk