Анџелина Џоли уште еднаш ја покажа својата хуманост со посета на палестински деца кои се лекуваат во болница во Египет.
50-годишната актерка беше трогната од кошмарните приказни на децата за загубата на родители, роднини и пријатели. Меѓу нив беше и 9-годишниот Шади, кој беше извлечен од под урнатините и во моментов чека операција. Со солзи во очите, тој ѝ рече на Џоли: „Мајка ми беше убиена“.
„Многу ми е жал за сè низ што помина. Ти си многу храбар и имам огромна почит кон тебе. Верувам дека ќе пораснеш во голем човек, затоа што си преживеал толку многу“ – му одговори Џоли.
16-годишната Римас на Анџелина ѝ раскажа дека поминала 5 месеци во болница во Газа, откако инфекцијата на нејзината повредена нога се влошила и лекарите размислувале за ампутација. Благодарение на лекарите во Египет, нејзината нога била спасена.
„Благодариме што дојде. Тоа ни покажува дека во светот сè уште постои човечност и луѓе на кои им е грижа за нас“ – ѝ порачале децата.
Анџелина Џоли изјавила дека ѝ е чест што ги запознала и изразила надеж дека во иднина ќе имаат можност да живеат во мир.
Посетата беше организирана од непрофитната организација International Network for Aid, Relief and Assistance (INARA).
