„Заедно создаваме нови почетоци“ – Newborn Clinic ќе донира од секоја приватна ин витро процедура за поддршка на СОС Детско село

На Меѓународниот ден на детето, со огромно задоволство ја најавуваме официјалната соработка и почетокот на хуманитарната кампања помеѓу водечкиот ин витро центар Newborn Clinic и СОС Детско село Македонија. Под главниот слоган „Заедно создаваме нови почетоци“, оваа двомесечна иницијатива има за цел да ја поврзе симболиката на новиот живот со поддршката и грижата за децата и младите без родителска грижа.

Она што ја прави оваа кампања особено значајна е нејзиниот директен и конкретен хуманитарен механизам: во текот на месеците јуни и јули, за секоја реализирана приватна ин витро (IVF) процедура, Newborn Clinic ќе одвојува и донира средства наменети за поддршка на работата и делувањето на СОС Детско село. На овој начин, секое семејство кое го започнува својот пат кон родителството, станува дел и од поширока мисија за поддршка на децата и семејствата на кои таа поддршка им е најпотребна.

„Во Newborn Clinic секојдневно сме сведоци на чудото наречено нов живот и на огромната храброст и желба на луѓето да станат родители. Но, нашата мисија не завршува во моментот кога ќе се роди едно бебе. Ние веруваме дека одговорноста на општеството е да му обезбеди на секое дете сигурна средина во која ќе расте и ќе се развива. Преку одвојувањето средства од секое приватно ин витро, сакаме директно да придонесеме кон тоа децата поддржани од СОС Детско село да имаат топлина, љубов и еднакви можности за безбедно детство. Истовремено, преку оваа кампања сакаме и нашите пациенти да почувствуваат дека започнувајќи го својот пат кон родителството, тие веќе прават едно прекрасно, добро дело и за некое друго дете кое веќе постои и има потреба од поддршка. Соработката со СОС Детско село е природен чекор за нас – бидејќи заедно навистина создаваме нови почетоци“, изјави раководниот тим на Newborn Clinic.

Врската помеѓу центарот и децата поддржани од СОС Детско село има своја претприказна која доаѓа директно од срцето на тимот и веќе бележи конкретни дела. Надоврзувајќи се на досегашната поддршка, зад која стои значајна институционална донација од страна на Newborn Clinic, вработените дополнително и самоиницијативно се вклучија преку индивидуално донаторство, покажувајќи ја својата лична хумана страна. Како дел од тие претходни дружења, тимот неодамна ги однесе децата на театарска претстава – настан кој дополнително ја зацврсти желбата оваа поддршка да прерасне во долгорочна соработка.

„За нас, ова партнерство има особено силна симболика – затоа што зборува за нови почетоци, надеж и иднина. Додека Newborn Clinic им помага на семејствата да го започнат своето родителско патување, заедно испраќаме порака дека секое дете заслужува љубов, сигурност и можност да расте во безбедна и поддржувачка средина.

Особено нѐ радува што оваа кампања ги поврзува хуманоста, семејството и солидарноста на еден искрен и автентичен начин, а уште повеќе што зад неа стои тим кој веќе покажа вистинска грижа и посветеност кон децата и младите кои ги поддржуваме“, изјавија од СОС Детско село Македонија.

Кампањата ќе се реализира во текот на јуни и јули, а покрај комуникацијата на дигиталните канали, во рамки на кампањата се предвидени и заеднички активности, едукативни содржини и дружења помеѓу тимот на клиниката и децата, со цел создавање на искрени и значајни искуства.